আকৌ এবাৰ বিজেপি চৰকাৰ: অসমৰ বাবে নতুন দায়িত্বৰ পাঁচ বছৰ
অসমৰ জনসাধাৰণে পুনৰবাৰ বিজেপি চৰকাৰক শাসনৰ সুযোগ দিছে। এই জয় কেৱল ৰাজনৈতিক সফলতা নহয়, বৰঞ্চ এয়া ডাঙৰ এখন দায়িত্বও। ২০২৬ চনৰ নিৰ্বাচনত বিজেপিয়ে ১২৬ খন আসনৰ ভিতৰত ৮২ খন আসন লাভ কৰি পুনৰ চৰকাৰ গঠন কৰিছে আৰু ড° হিমন্ত বিশ্ব শৰ্মাই দ্বিতীয়বাৰৰ বাবে মুখ্যমন্ত্ৰী হিচাপে শপত গ্ৰহণ কৰিছে। এই ফলাফলে বুজাইছে যে মানুহে চৰকাৰখনৰ ওপৰত পুনৰ আস্থা প্ৰকাশ কৰিছে। এতিয়া আগন্তুক পাঁচ বছৰত চৰকাৰে এই আস্থাক কেনেকৈ ৰক্ষা কৰে, সেয়াই আটাইতকৈ গুৰুত্বপূৰ্ণ বিষয়।
বিজেপিয়ে নিৰ্বাচনত জয়লাভ কৰিছে—এইটো সত্য। কিন্তু এতিয়া মূল প্ৰশ্নটো হ’ল, চৰকাৰে কেনেধৰণৰ অসম গঢ়ি তুলিব বিচাৰে? অসমৰ দৰে বহু ভাষা, বহু জাতি আৰু বহু সংস্কৃতিৰ ৰাজ্যক কেৱল আবেগিক বা বিভাজনমূলক ৰাজনীতিৰে আগবঢ়াব নোৱাৰি। ৰাজ্যখনক উন্নয়নৰ বাবে প্ৰয়োজন ভাল পথ-ঘাট, চাকৰিৰ সুযোগ, উন্নত বিদ্যালয়-মহাবিদ্যালয়, স্বাস্থ্যসেৱা, বান নিয়ন্ত্ৰণ আৰু স্বচ্ছ প্ৰশাসন। ইয়াৰ লগতে প্ৰয়োজন পৰিপক্ব ৰাজনীতি আৰু সকলোকে লগত লৈ আগবঢ়াৰ মানসিকতা।
বিগত কেইবছৰত বিজেপি চৰকাৰে কিছু উল্লেখযোগ্য কাম কৰিছে। ২০২৫-২৬ বৰ্ষৰ বাজেটত মহিলা স্ব-সহায়ক গোটসমূহৰ বাবে “মুখ্যমন্ত্ৰী মহিলা উদ্যোগিতা অভিযান”ৰ অধীনত আৰ্থিক সহায় আগবঢ়োৱা হৈছে। “মুখ্যমন্ত্ৰী জীৱন প্ৰেৰণা” ময়না আঁচনি আৰু বাবু আঁচনিৰ জৰিয়তে স্নাতক যুৱক-যুৱতীসকলক সহায় দিয়া হৈছে। খাদ্য সুৰক্ষা আঁচনিৰ অধীনত ৰেহাইমূল্যত খাদ্য সামগ্ৰী বিতৰণো কৰা হৈছে। অসমৰ অৰ্থনীতিৰ বৃদ্ধিৰ ক্ষেত্ৰতো কিছু ইতিবাচক ফলাফল দেখা গৈছে। কৃষি আৰু সেৱা খণ্ডৰ উন্নয়নে ৰাজ্যখনৰ বিকাশৰ দিশ দেখুৱাইছে। কিন্তু কেৱল পৰিসংখ্যাই উন্নয়নৰ সম্পূৰ্ণ ছবি নিদিয়ে। বাস্তৱ উন্নয়ন তেতিয়াহে দেখা যাব, যেতিয়া সেই সুফল সাধাৰণ মানুহৰ জীৱনত স্পষ্টভাৱে অনুভৱ কৰিব পৰা যাব।
আগন্তুক পাঁচ বছৰত চৰকাৰৰ প্ৰথম লক্ষ্য হ’ব লাগে—যুৱসমাজৰ বাবে চাকৰি সৃষ্টি কৰা। অসমৰ বহু শিক্ষিত যুৱক-যুৱতী এতিয়াও উপযুক্ত চাকৰিৰ অভাৱত সমস্যাৰ সন্মুখীন হৈছে। চৰকাৰে আসম ষ্টাৰ্ট-আপ (Startup Assam) ৰ দৰে উদ্যোগ আৰম্ভ কৰিছে, যাৰ উদ্দেশ্য হৈছে যুৱসমাজক উদ্যোগী হিচাপে গঢ়ি তোলা। এই উদ্যোগক অধিক শক্তিশালী কৰিব লাগিব। জিলাভিত্তিক ষ্টাৰ্টআপ কেন্দ্ৰ, সহজ ঋণ ব্যৱস্থা, ক্ষুদ্ৰ উদ্যোগৰ সহায় আৰু কৃষি, পৰ্যটন, ডিজিটেল সেৱা, তাঁতশিল্প আদিত অধিক সুযোগ সৃষ্টি কৰিব লাগিব। যদি চৰকাৰে যুৱসমাজক স্বনিয়োজিত আৰু আত্মনিৰ্ভৰশীল কৰি তুলিব পাৰে, তেন্তে সেয়াই হ’ব আটাইতকৈ ডাঙৰ সফলতা।
শিক্ষাক্ষেত্ৰত বিজেপি চৰকাৰে কিছুমান প্ৰশংসনীয় পদক্ষেপ গ্ৰহণ কৰিছে। বিশেষকৈ বিদ্যালয়সমূহৰ প্ৰভিন্সিয়েলাইজেচন আৰু শিক্ষক-অশিক্ষক কৰ্মচাৰীসকলৰ চাকৰিৰ সুৰক্ষাৰ ক্ষেত্ৰত চৰকাৰে গুৰুত্বপূৰ্ণ কাম কৰিছে। বহু বছৰ ধৰি অনিশ্চয়তাৰ মাজত কাম কৰি থকা শিক্ষক আৰু কৰ্মচাৰীসকলক চৰকাৰী ব্যৱস্থাৰ অধীনলৈ আনিবলৈ বিভিন্ন আইন আৰু সংশোধনী গৃহীত কৰা হৈছে। ইয়াৰ ফলত বহু পৰিয়ালে আৰ্থিক সুৰক্ষা লাভ কৰিব পাৰে।
ইয়াৰ উপৰিও উচ্চ শিক্ষাৰ ক্ষেত্ৰতো চৰকাৰে নতুন বিশ্ববিদ্যালয় আৰু শিক্ষানুষ্ঠান স্থাপনৰ চেষ্টা কৰিছে। আজিম প্ৰেমজী ইউনিভাৰ্চিটী এক্ট, ২০২৫ (Azim Premji University Act, 2025) গৃহীত হোৱাটো উল্লেখযোগ্য পদক্ষেপ। যদি আজিম প্ৰেমজী বিশ্ববিদ্যালয় অসমত স্থাপিত হয়, তেন্তে ইয়াৰ দ্বাৰা অসমৰ লগতে সমগ্ৰ উত্তৰ-পূব ভাৰতৰ শিক্ষাব্যৱস্থাৰ উন্নয়ন হ’ব পাৰে। চৰকাৰে নতুন মহাবিদ্যালয়, ব্যক্তিগত বিশ্ববিদ্যালয়ৰ নিয়ন্ত্ৰণ আৰু ডিজিটেল শিক্ষাৰ ক্ষেত্ৰতো কিছুমান ইতিবাচক পদক্ষেপ গ্ৰহণ কৰিছে।
কিন্তু কেৱল বিদ্যালয় বা বিশ্ববিদ্যালয় স্থাপন কৰিলেই যথেষ্ট নহয়। শিক্ষাৰ মান উন্নয়ন কৰাটোও সমান গুৰুত্বপূৰ্ণ। শিক্ষক প্ৰশিক্ষণ, গৱেষণা, গ্ৰন্থাগাৰ, বিজ্ঞান শিক্ষা, ডিজিটেল সুবিধা আৰু চাকৰিমুখী শিক্ষাৰ ওপৰত অধিক গুৰুত্ব দিব লাগিব।
স্বাস্থ্যখণ্ডতো চৰকাৰে অধিক মনোযোগ দিয়াৰ প্ৰয়োজন আছে। অসমৰ বহু অঞ্চলত উন্নত চিকিৎসা সুবিধা এতিয়াও সহজলভ্য নহয়। বানপানী আৰু দূৰৱৰ্তী অঞ্চলৰ সমস্যাৰ বাবে বহু মানুহ সময়মতে চিকিৎসা লাভ নকৰে। সেয়ে চৰকাৰে প্ৰাথমিক স্বাস্থ্যকেন্দ্ৰ, জিলা চিকিৎসালয় আৰু মোবাইল স্বাস্থ্যসেৱা শক্তিশালী কৰিব লাগিব।
বানপানী অসমৰ অন্যতম ডাঙৰ সমস্যা। প্ৰতি বছৰে বানপানীয়ে মানুহৰ ঘৰ-বাৰী, কৃষিভূমি আৰু জীৱিকা ধ্বংস কৰে। সেয়ে চৰকাৰে বান নিয়ন্ত্ৰণক অস্থায়ী সমস্যা হিচাপে নহয়, স্থায়ী নীতি হিচাপে ল’ব লাগিব। নদী ভাঙন নিয়ন্ত্ৰণ, উন্নত ড্ৰেইনেজ ব্যৱস্থা আৰু আগতীয়া সতৰ্কীকৰণ ব্যৱস্থাৰ ওপৰত গুৰুত্ব দিব লাগিব।
মহিলাৰ সবলীকৰণ চৰকাৰৰ অন্যতম লক্ষ্য হ’ব লাগে। মহিলাসকলক কেৱল সহায় লাভ কৰা ব্যক্তি হিচাপে নহয়, অৰ্থনৈতিকভাৱে শক্তিশালী অংশীদাৰ হিচাপে গঢ়ি তুলিব লাগিব। স্ব-সহায়ক গোট, ক্ষুদ্ৰ উদ্যোগ আৰু দক্ষতা উন্নয়নৰ জৰিয়তে মহিলাসকলক অধিক সুযোগ দিব লাগিব।
কিন্তু আটাইতকৈ গুৰুত্বপূৰ্ণ বিষয়টো হ’ল—চৰকাৰে ধৰ্ম আৰু সাম্প্ৰদায়িক বিভাজনৰ ৰাজনীতিৰ পৰা আঁতৰি থাকিব লাগিব। অসম এখন বহু জাতি, বহু ধৰ্ম আৰু বহু সংস্কৃতিৰ ৰাজ্য। হিন্দু-মুছলমান বিভাজন সৃষ্টি কৰি কোনো ৰাজ্য দীৰ্ঘম্যাদীভাৱে আগবাঢ়িব নোৱাৰে। ঘৃণামূলক ভাষণ, সাম্প্ৰদায়িক উত্তেজনা আৰু বিভাজনমূলক ৰাজনীতি সমাজৰ বাবে ক্ষতিকাৰক। চৰকাৰে সকলো ধৰ্ম আৰু সম্প্ৰদায়ক সমান সন্মান দিব লাগিব আৰু সংবিধানৰ নীতি অনুসৰি শাসন চলাব লাগিব।
অসমৰ উন্নয়ন তেতিয়াহে সম্ভৱ, যেতিয়া সকলো মানুহে নিজকে সমান নাগৰিক বুলি অনুভৱ কৰিব। উন্নয়ন, শান্তি আৰু সম্প্ৰীতি—এই তিনিটা বিষয়ক একেলগে আগবঢ়াব পাৰিলেহে ৰাজ্যখন সত্যিকাৰ অৰ্থত শক্তিশালী হ’ব।
শেষত ক’ব পাৰি যে অসমৰ জনসাধাৰণে বিজেপিক পুনৰবাৰ সুযোগ দিছে। কিন্তু এই সুযোগ কেৱল উদযাপনৰ নহয়; এয়া হৈছে এটা ডাঙৰ পৰীক্ষা। আগন্তুক পাঁচ বছৰত মানুহে চৰকাৰক ভাষণ বা প্ৰতিশ্ৰুতিৰে নহয়, বাস্তৱ কামৰ ভিত্তিত বিচাৰ কৰিব। যদি চৰকাৰে উন্নয়ন, শিক্ষা, স্বাস্থ্য, স্বচ্ছতা আৰু সামাজিক সম্প্ৰীতি বজাই ৰাখিব পাৰে, তেন্তে এই পাঁচ বছৰ অসমৰ বাবে এক ইতিবাচক আৰু স্মৰণীয় অধ্যায় হৈ থাকিব।
